Archive

Archive for the ‘અમીન આઝાદ’ Category

રાત ચાલી ગઈ – ‘અમીન’ આઝાદ

March 26, 2013 Leave a comment

જશે, ચાલી જશે, ગઈ, એ વિચારે રાત ચાલી ગઈ,
ખબર પણ ના પડી અમને કે ક્યારે રાત ચાલી ગઈ?

તમે જ્યાં આંખ મીંચી કે, બધે અંધકાર ફેલાયો,
તમે જોયું અને એક જ ઈશારે, રાત ચાલી ગઈ…

હજી તારાની સાથે જ્યોત્સ્નાની વાત કરતો’તો,
હજી સાંજે તો આવી’તી, સવારે રાત ચાલી ગઈ…

જુઓ રંગભેદથી બે નારીઓ ના રહી શકી સાથે,
ઉષા આવી તો શરમાઈ, સવારે રાત ચાલી ગઈ…

તમારા સમ ‘અમીન’ ઊંધી શક્યો, ના રાતભર આજે,
પરંતુ કલ્પનાઓના સહારે, રાત ચાલી ગઈ…

– ‘અમીન’ આઝાદ

Advertisements

માગ્યા વગર મળે – ‘અમીન’ આઝાદ

March 25, 2013 Leave a comment

લજ્જત મળે તો એવી કે આઠે પ્રહર મળે,
હર દર્દની છે માગણી, મારું જીગર મળે…

આંખોની જીદ કે અશ્રુ નિરાધાર થઈ જશે,
અશ્રુની જીદ કે, તેમના પાલવમાં ઘર મળે…

મારી નજરને જોઈને દુનિયા ફરી ગઈ,
દુનિયા ફરી વળે જો, તમારી નજર મળે…

ભટકી રહ્યો છું તેથી મોહબ્બના રાહ પર,
પગથીઓ આવનારને આ પંથ પર મળે…

ઓછી નથી જીવનને કટુતા મળી છતાં,
હર ઝેર પચતુ જાય છે, જે પ્રેમ પર મળે…

અલ્લાહના કસમ કે એ રહેમત ગુનાહ છે,
રહેમત કદી ન લઉં જો, ગુનાહો વગર મળે…

મંઝીલ મળી જશે તો ન રહેશે કશું પછી,
મુજને સતત પ્રવાસ એ, ઠોકર વગર મળે…

ઈચ્છાઓ કેટલી મને ઈચ્છા વગર મળી,
કોણે કહ્યું ‘અમીન’, ન માગ્યા વગર મળે…

– ‘અમીન’ આઝાદ