Home > કવિતા, ગઝલ, રાજેશ વ્યાસ મિસ્કીન > બધે જ દોડી લઈ – રાજેશ વ્યાસ ‘મિસ્કીન’

બધે જ દોડી લઈ – રાજેશ વ્યાસ ‘મિસ્કીન’

July 13, 2014

બધું જ જોઈ લીધું છે બધે જ દોડી લઈ,
બધા જ હાથમાં ઊભા હતા હથોડી લઈ…

ઘણાંય લાગણી ઉઘરાવતા ફરે કાયમ,
સદાય આંસુ-ઉદાસીની કાંખઘોડી લઈ…

કદીક કોઈને પૂછ્યું હતું અટકવું’તું,
બધું બગાડી મૂક્યું છે સ્વયમનું ફોડી લઈ…

ગયું’તું ડૂબી બધું કાલ મરજીવાનું પણ,
સવાર પડતાં ગયો દરિયે ફરી હોડી લઈ…

ઉદાસ ડાળ પછી સાંજ લગી રહી રડતી,
ઘડીક કોઈ થયું ખુશ ફૂલ તોડી લઈ…

રહ્યો ન ભાર કશો, હળવા ફરાયું ‘મિસ્કીન’,
મુસાફરીમાં નીકળ્યો’તો બે જ જોડી લઈ…

– રાજેશ વ્યાસ ‘મિસ્કીન’

Advertisements
%d bloggers like this: