Home > કવિતા, ગઝલ, ગીત, જવાહર બક્ષી > ફરી ન છૂટવાનું બળ – જવાહર બક્ષી

ફરી ન છૂટવાનું બળ – જવાહર બક્ષી

September 10, 2013

ફરી ન છૂટવાનું બળ જમા કરે કોઇ,
પ્રસંગ, નહિ તો મિલનના જતા કરે કોઇ…

મને ઘણાય તમારો સંબંધ પૂછે છે,
તમારી પણ કદી એવી દશા કરે કોઇ…

તમારી પાસ જવાની નથી થતી ઇચ્છા,
મને ફરીથી જવાની મના કરે કોઇ…

ભલે અવાજની ક્ષિતીજમાં જઇ ન શકાય,
વિચારને તો જતા-આવતા કરે કોઇ…

કોઇ નજીક નથી, એ વિષે હું કૈં ન કહું,
આ સંકડાશ વિષે સ્પષ્ટતા કરે કોઇ…

ગુન્હા કર્યા તો ‘ફના’ મેં ગુન્હા તમારા કર્યા,
મને એ માન્ય નથી કે સજા કરે કોઈ…

– જવાહર બક્ષી

Advertisements
%d bloggers like this: