Home > કવિતા, ગઝલ, ગીત, સૈફ પાલનપુરી > જાગરણનો અર્થ – ‘સૈફ’ પાલનપુરી

જાગરણનો અર્થ – ‘સૈફ’ પાલનપુરી

August 9, 2013

મીંચેલી આંખે મળ્યો જ્યારે જાગરણનો અર્થ,
ત્યારે ખબર પડી કે છે શું આવરણનો અર્થ…

સંકોચ શું છે એની ખરી ત્યારે જાણ થઇ,
મૃગજળને જઇને પૂછ્યો મેં વહેતાં ઝરણનો અર્થ…

આબોહવા તો હોય છે, આબોહવાનું શું?
વાતાવરણ જો હોય તો વાતાવરણનો અર્થ?

છેવટનો અંત આવી ગયો સૌ પ્રયાસનો,
મારી નજીક એ જ છે મંગળાચરણનો અર્થ?

નિષ્ઠુર છું, હું ચાહું તો તો હમણાં હસી શકું,
પણ એમાં દિલ ન લાગે તો શું આચરણનો અર્થ?

છૂટા પડી ગયા તો સમજદાર થઇ ગયા,
સમજી ગયા કે શું હતો એકીકરણનો અર્થ…

સ્વપ્નાની વાત કોઇને કહેતા નથી હવે,
સમજી ગયા છે ‘સૈફ’ હવે અવતરણનો અર્થ…

– ‘સૈફ’ પાલનપુરી

Advertisements
%d bloggers like this: